PM Modi જાપાનમાં: મોદી સુઝુકી અને સોફ્ટ બેંકના વરિષ્ઠ અધિકારીઓને મળ્યા, ભારતમાં રોકાણ સહિત આ મહત્વપૂર્ણ મુદ્દાઓ પર ચર્ચા કરી
પીએમ મોદી ટોક્યોમાં એનઈસી ચેરમેન સાથે મળ્યા: વડા પ્રધાન નરેન્દ્ર મોદી સાથેની બેઠક દરમિયાન, એનઈસી અધ્યક્ષે ભારતમાં સ્માર્ટ શહેરોને ટેકો આપવાની રીતો પર ચર્ચા કરી અને કહ્યું કે એનઈસી શિક્ષણના ક્ષેત્રમાં ભારતમાં યોગદાન આપવાની યોજના ધરાવે છે. બેઠક દરમિયાન તેમણે વડાપ્રધાન મોદીના જોરદાર વખાણ કર્યા હતા.
જાપાનની તેમની બે દિવસીય મુલાકાત દરમિયાન, વડાપ્રધાન નરેન્દ્ર મોદીએ સોમવારે ટોક્યોમાં જાપાની બહુરાષ્ટ્રીય કંપની NEC કોર્પોરેશનના ચેરમેન નોબુહિરો એન્ડો સાથે બેઠક યોજી હતી. આ બેઠક દરમિયાન બંને વચ્ચે ભારતમાં સ્માર્ટ સિટી અને શિક્ષણમાં સહકાર અંગે ચર્ચા થઈ હતી.
NEC ચીફે પીએમ મોદીની પ્રશંસા કરી તેમણે કહ્યું કે પીએમ મોદી ક્ષમતાઓને આગળ લઈ જવાના મજબૂત ઈરાદા ધરાવે છે. મોદી સાથેની મુલાકાત દરમિયાન, તેમણે ભારતમાં સ્માર્ટ સિટીઝને ટેકો આપવાની રીતો પર ચર્ચા કરી અને કહ્યું કે NEC શિક્ષણ ક્ષેત્રે ભારતમાં યોગદાન આપવાની યોજના ધરાવે છે. અત્રે જણાવી દઈએ કે, વડાપ્રધાન નરેન્દ્ર મોદી પોતાની મુલાકાત દરમિયાન જાપાનના બિઝનેસ લીડર્સ સાથે પણ મુલાકાત કરી ચૂક્યા છે. આ સાથે તેઓ ભારતીય સમુદાય સાથે પણ વાતચીત કરશે.
ઓસામુ સુઝુકી સાથે રોકાણ અંગેની ચર્ચા
વડાપ્રધાન નરેન્દ્ર મોદી સુઝુકી મોટર કોર્પોરેશનના સલાહકાર ઓસામુ સુઝુકીને પણ મળ્યા હતા. વાતચીત દરમિયાન, બંનેએ ભારતમાં રોકાણ, નવીનતા, ઇલેક્ટ્રિક વાહનોના ઉત્પાદન અને રિસાયક્લિંગ કેન્દ્રો માટેની તકો અંગે ચર્ચા કરી. ઓસામુ સુઝુકી સાથેની મીટિંગમાં, પીએમ મોદીએ ભારતના ઓટોમોટિવ ઉદ્યોગમાં સુઝુકીની પરિવર્તનકારી ભૂમિકાની પ્રશંસા કરી, વિદેશ મંત્રાલયના પ્રવક્તા અરિંદમ બાગચીએ ટ્વિટ કર્યું.
સુઝુકી ભારતમાં મોટું રોકાણ કરશે
આ વર્ષે માર્ચમાં, સુઝુકી મોટર કોર્પોરેશને જાહેરાત કરી હતી કે તે ગુજરાતમાં બેટરી ઇલેક્ટ્રિક વાહનો (BEVs) અને બેટરીના સ્થાનિક ઉત્પાદન માટે 2026 સુધીમાં લગભગ 150 બિલિયન યેન (આશરે રૂ. 10,445 કરોડ)નું રોકાણ કરશે. કંપનીની સંપૂર્ણ માલિકીની એન્ટિટી સુઝુકી મોટર ગુજરાત પ્રાઇવેટ લિમિટેડ (SMG) 2026 સુધીમાં SMGના હાલના પ્લાન્ટની જમીન પર BEV બેટરી માટેના પ્લાન્ટના નિર્માણ માટે રૂ. 7,300 કરોડનું રોકાણ કરશે. તેમજ SMG ઉત્પાદન ક્ષમતા વધારવા માટે રૂ. 3,100 કરોડનું રોકાણ કરશે.
ટેક્સટાઇલ સેક્ટરને પ્રોત્સાહન આપવાની પહેલ
સોમવારે તેમની મુલાકાત દરમિયાન વડાપ્રધાન મોદીએ સોફ્ટબેંક ગ્રુપ કોર્પના બોર્ડ ડાયરેક્ટર માસાયોશી સોન સાથે પણ લાંબી વાતચીત કરી હતી. આ ઉપરાંત, તેમણે જાપાનની મુખ્ય ક્લોથિંગ બ્રાન્ડ યુનિક્લોના સીઈઓ સાથે બેઠક યોજી હતી અને ભારતમાં ટેક્સટાઈલ મેન્યુફેક્ચરિંગ ક્ષેત્રે રોકાણની તકો અંગે ચર્ચા કરી હતી. પ્રવક્તા અરિંદમ બાગચીએ કહ્યું કે વડાપ્રધાન મોદી અને યુનિક્લોના સીઈઓ તાદાશી યાનાઈ વચ્ચેની બેઠક ભારતના ટેક્સટાઈલ ક્ષેત્રને પ્રોત્સાહન આપનારી સાબિત થશે. તેમણે ટ્વિટ કર્યું કે મીટિંગ દરમિયાન મોદીએ યાનાઈને ભારતીય ટેક્સટાઈલ સેક્ટરને વધુ મજબૂત કરવાના ઉદ્દેશ્યથી પીએમ-મિત્ર યોજનામાં ભાગ લેવા આમંત્રણ આપ્યું. યાનાઈએ ભારતના લોકોની ઉદ્યોગસાહસિક ભાવનાની ખૂબ પ્રશંસા કરી.
મોદી 24 મેના રોજ જાપાનના પીએમને મળશે
વડાપ્રધાન 24 મેના રોજ જાપાનના વડાપ્રધાન ફુમિયો કિશિદા સાથે દ્વિપક્ષીય બેઠક કરશે. પીએમ કિશિદા સાથેની મુલાકાત બંને નેતાઓને માર્ચમાં આયોજિત 14મી ભારત-જાપાન વાર્ષિક શિખર સંમેલનથી તેમની વાતચીતને આગળ વધારવાની તક પૂરી પાડશે. જાપાનમાં ભારતીય રાજદૂત સંજય કુમાર વર્માએ રવિવારે કહ્યું કે પીએમ મોદી 35 બિઝનેસ લીડર્સ સાથે રાઉન્ડ ટેબલ મીટિંગ કરશે. આ રાઉન્ડ ટેબલ બેઠક બાદ વડાપ્રધાન બિઝનેસ લીડર્સ સાથે અલગ-અલગ બેઠક પણ કરશે.
